धरानको मतगणना स्थलमा माओवादीको नाराबाजी

धरान उपमहानगरपालिका वडा नम्बर २० को मतगणनास्थलमा नेकपा माओवादी केन्द्रका नेता तथा कार्यकर्ताले नाराबाजी गरेका छन् ।

वडाको मतगणना गर्ने क्रममा १८ वटा मतपत्रमा मतदान अधिकृतको हस्ताक्षर नभएको पाइएपछि माओवादीले विरोध जनाएको हो ।

माओवादी कार्यकर्ताहरूले मतदान अधिकृतको विरोध गर्दै मतगणना स्थल पब्लिक स्कुलमा तोडफोड गरेका छन् ।मतदान अधिकृतको हस्ताक्षर नभएको मतपत्र सदर गर्नुपर्ने उनीहरूको माग छ ।

अहिले पनि उनीहरूले नाराबाजी गरिरहेका छन् । माओवादी केन्द्रका धरान सह–इन्चार्ज सुदर्शन श्रेष्ठले निर्वाचनमा खटिएका कर्मचारीले चरम लापरबाही गरेकाले आन्दोलन गर्नुपरेको बताए ।

हस्ताक्षर नगरिएका मतपत्र सदर नगरेको अवस्थामा धरान–२० मा पुनः मतदान गर्नुपर्ने उनको भनाइ छ । नाराबाजी र मतगणनास्थल तोडफोडसँगै धरानको मतगणना स्थगित भएको छ ।