चुनावी सरगर्मीसँगै सद्भाव फर्काउन पहल

कैलाली। नेपाली कांग्रेसका नेता तथा सत्ता साझेदार चार दलका साझा उम्मेदवार रामजनम चौधरी पछिल्लो साता टीकापुर नगरपालिकासहित आसपासका क्षेत्रमा मत माग्न पुगे। थारू बाहुल्य क्षेत्रमा चुनावी प्रचारमा जाँदा उम्मेदवार चौधरीलाई मतदाताले राखेको एउटै माग थियो, “टीकापुर घटनाको विषयलाई जसरी पनि सुरक्षित अवतरण (सेफल्यान्डिङ) गराउनुप(यो।”

चौधरीले भने, “टीकापुर घटनापछि कैलाली क्षेत्र नं १ निकै ठूलो सामाजिक सङ्कटमा जुधिरहेको छ। त्यसैले यो समस्याको औपचारिक रूपमा समाधान खोज्न पहल गरे मत दिने वचनबद्धता मतदाताले व्यक्त गर्नुभएको छ। यो विषय निकै सघन रूपमा उठिरहेको छ।”

कैलालीका पाँचवटा निर्वाचन क्षेत्रमा प्रतिनिधि सभा सदस्यका लागि ४८ जनाको उम्मेदवारी परेको छ। तर विकास निर्माण र समुन्नतिको मार्गचित्रभन्दा पनि बढी ‘टीकापुर घटना’ बहसमा छ। यस क्षेत्रमा पर्ने टीकापुरमा २०७२ भदौ ७ गते भएको घटनाले अरू सबैका चुनावी मुद्दा प्रायः ओझेलमा परेका छन्।

थरुहट आन्दोलनका क्रममा नेपाल प्रहरीका वरिष्ठ प्रहरी उपरीक्षक (एसएसपी) लक्ष्मण न्यौपानेसहित सात जना सुरक्षाकर्मी एवं दुई वर्षीय बालक टेकेन्द्र साउदको मृत्यु र ५० जनाभन्दा बढी सुरक्षाकर्मी घाइते भएको घटना अझै पनि सेलाएको छैन।

२०७४ को निर्वाचनमा थरुहट आन्दोलनको नेतृत्वकर्तामध्येका एक रेशमलाल चौधरी विजयी भएका थिए। ‘टीकापुर घटना’का मुख्य दोषी चौधरी फरार अवस्थामै चुनाव जितेर पूरा कार्यकाल जेलमै बिताए। जन्मकैदको फैसलापछि उनी जेलमै रहेका छन्। आगामी निर्वाचनमा नागरिक उन्मुक्ति पार्टी प्रमुख तथा चौधरीकी श्रीमती रञ्जिता श्रेष्ठ चौधरीले पनि उम्मेदवारी दिएकी छन्।

नेत्री श्रेष्ठले पनि ‘टीकापुर घटना’लाई नै चुनावी मुद्दा बनाएकी छन्। कांग्रेस नेता चौधरीका अनुसार ५८ जनामाथि मुद्दा लागेकोमा ३१ जना अझै फरार सूचीमा रहेका छन्। उनले भने, “२७ जनालाई हिरासतमा राखिएको थियो। जिल्ला अदालतको फैसलापछि केही छुटे, केही कारागार चलान भए। उच्च अदालतको फैसलापछि सर्वोच्चमा यो मुद्दा चलिरहेको छ । तर यो विषयलाई नयाँ तरिकाबाट समाधान खोज्नैपर्ने आवश्यकता छ।” गोरखापत्र दैनिकबाट