नख्खु पुगेर सुदनले भेटे रवि

काठमाडौं । जेनजी अभियन्ता सुदन गुरुङले बिहीबार नख्खु कारागार पुगेर राष्ट्रिय स्वतन्त्रता पार्टी (रास्वपा) सभापति रवि लामिछानेसँग भेट गरेका छन् ।

भेटमा वैकल्पिक राजनीतिक शक्तिहरूबीच एकता आवश्यक रहेको प्रस्ताव गुरुङले राखे, जसप्रति लामिछाने सकारात्मक रहेको गुरुङले जनाए । गुरुङका अनुसार रविले, “सबै मिल्नुपर्छ, हामी पनि तयार छौँ,” भन्ने स्पष्ट संकेत दिएका छन् । साथै सहकारी मुद्दामा आफू अन्यायमा परेको दाबी गर्दै उनले छिटो न्यायिक निरूपणका लागि गुरुङलाई पहल गर्न आग्रह गरेका थिए । गुरुङले पनि मुद्दाको छिटो टुंगो आवश्यक रहेको बताउँदै सहयोग गर्ने आश्वासन दिए ।

भेटमा लामिछानेले जेनजी आन्दोलनलाई समर्थन व्यक्त गर्दै देश निर्माणका लागि वैकल्पिक धारका सबै शक्ति एकजुट हुनुपर्ने धारणा राखेको गुरुङले बताए । यसअघि बालेन शाह र कुलमान घिसिङको भेटघाटमा पनि आफूले सहजीकरण गरेको दाबी गुरुङले गरेका छन् ।

उज्यालो नेपालका एक शीर्ष नेताले समेत गुरुङले मिलनका प्रयासमा भूमिका खेलेको पुष्टि गरेका छन् । तत्कालीन प्रधानमन्त्री केपी शर्मा ओली, गृहमन्त्री रमेश लेखक लगायतलाई पक्राउ गर्न सरकारलाई दबाब दिँदै आएका गुरुङलाई सरकारले सुनुवाइ गर्न छाडेपछि उनी अहिले वैकल्पिक शक्तिहरूलाई एक बनाउने अभियानमा होमिएका छन् ।