सुदूरपश्चिम लगातार ५ खेल जित्दै प्लेअफमा, जनकपुर भने लिग चरणबाटै बाहिरिने संघारमा

काठमाडौं। दोस्रो संस्करणको नेपाल प्रिमियर लिग (एनपीएल)को आज भएको दोस्रो खेलमा सुदूरपश्चिम रोयल्सले जनकपुर बोल्ट्सलाई पराजित गरेको छ। जनकपुरलाई ६ विकेटले पराजित गर्दै सुदुरपश्चिमले प्लेअफमा प्रवेश गरेको छ।

जनकपुरले दिएको १४६ रनको लक्ष्य सुदुरपश्चिमले १७.४ ओभरमा ४ विकेट गुमाएर पुरा गर्‍यो। सुदुरपश्चिमका इशान पाण्डेले अर्धसतकीय पारी खेले। उनले ३५ बलमा ५६ रन बनाए। यस्तै बिनोद भण्डारीले ४२ तथा हरमित सिंहले २५ रन बनाए। जनकपुरका माज सदाकतले २ विकेट लिए।

यसअघि त्रिवि क्रिकेट मैदानमा टस जितेर पहिला ब्याटिङ गरेको जनकपुर बोल्ट्सले निर्धारित २० ओभरको खेलमा ८ विकेट गुमाउँदै १४५ रन बनाएको थियो। जनकपुरका संजय कृष्णमूर्तीले ५० रन बनाए। सुदुरपश्चिमका अभिनाश बोहोराले चार तथा स्कट कुग्गेलिनले तीन विकेट लिए।

जितसँगै सुदुरपश्चिम जारी एनपीएलमा प्लेअफ पुग्ने पहिलो टोली बनेको छ। ५ खेल खेलेको सुदुरपश्चिमले सबै खेल जित्दै १० अंकसहित तालिकाको शीर्ष स्थानमा रहेको छ। ४ खेल खेलेको जनकपुरले भने अहिलेसम्म एक खेल पनि जितेको छैन। साविक विजेता जनकपुर भने लिग चरणबाटै बाहिरिने संघारमा छ।