भारत एशिया कपको फाइनलमा

काठमाडौँ । भारतले बंगलादेशलाई ४१ रनले पराजित गर्दै एसिया कपको फाइनलमा प्रवेश गरेको छ ।

दुबई अन्तर्राष्ट्रिय रंगशालामा बुधबार राति सम्पन्न खेलमा भारतले दिएको १६९ रनको लक्ष्य पछाएको बंगलादेशले  १९.३ ओभरमा अलआउट हुदै १२७ रन मात्र बनायो र खेलमा हार बेहोरेको थियो । उसका लागि सैफ हसनले सर्वाधिक ६९ रन बनाए । यसैबीच, भारतका लागि कुलदीप यादवले तीन विकेट लिए भने जसप्रीत बुमराह र वरुण चक्रवर्तीले दुई विकेट लिए । यसबाहेक अक्षर पटेल र तिलक वर्माले एक-एक सफलता पाए ।

भारत अपराजित रहँदै एसिया कपको फाइनलमा प्रवेश गरेको छ । भारतको अब सुपर फोरको एउटा खेल बाँकी छ, सेप्टेम्बर २६ मा श्रीलंकासँग खेल्ने तालिका छ । यो खेल फाइनल अघि भारतीय टोलीको लागि अभ्यास खेलको रूपमा हुने भएको छ, किनकी श्रीलंकाको सुपर फोरका दुवै खेल हारेर फाइनलको सम्भावना सकिएको छ  ।

भारत सुपर फोर अंक तालिकामा चार अंक र १.३५७ को नेट रनरेटका साथ शिर्ष स्थानमा छ । पाकिस्तान र बंगलादेश क्रमशः दोस्रो र तेस्रो स्थानमा छन् । बिहीबार दुई टोलीबीचको खेल सेमिफाइनल सरह भएको छ । यस खेलको विजेताले सेप्टेम्बर २८ मा फाइनलमा भारतसँग खेल्नेछ ।