हसिनालाई मृत्युदण्डको विरोधमा आज बंगलादेश बन्दको आव्हान

काठमाडौँ । बंगलादेशकी पूर्व प्रधानमन्त्री शेख हसिनाको प्रतिबन्धित पार्टी, अवामी लिगले उनलाई सुनाइएको मृत्युदण्डको विरोधमा आज देशव्यापी बन्दको आह्वान गरेको छ । अवामी लिगले ढाकामा रहेको अन्तर्राष्ट्रिय अपराध न्यायाधिकरण (आइसीटी) को निर्णयलाई पूर्ण रूपमा अस्वीकार गरेको छ ।

पार्टीले अन्तरिम सरकार प्रमुख मोहम्मद युनुस र मन्त्रीहरूको तत्काल राजीनामाको माग गरेको छ । अवामी लिग नेता जहाँगीर कबीर नानकले पार्टीको फेसबुक पेजमा एउटा भिडियो जारी गर्दै निर्णयलाई पक्षपाती र राजनीतिक प्रतिशोधको संज्ञा दिएका छन् ।

हसिनाविरुद्धको मुद्दा अगस्ट १४ मा सुरु भयो र नोभेम्बर १७ मा फैसला सुनाइएको थियो । अदालतले दुई महिनाको अवधिमा केवल २० दिनको सुनुवाइ गरेको थियो । मुद्धाको सुनुवाईको क्रममा ८४ साक्षीहरूमध्ये ५४ जनाको मात्र सुनुवाइ भयो र मुख्य न्यायाधीश एक महिना अनुपस्थित थिए, तैपनि फैसला सुनाइएको थियो ।

हसिनाको फैसलाको प्रतिक्रियामा देशभर हिंसा जारी छ । सरकारले उच्च सतर्कता घोषणा गरेको छ । ढाकामा १५ हजार प्रहरी तैनाथ गरिएको छ र हिंसात्मक प्रदर्शनकारीहरूमाथि गोली चलाउन आदेश दिइएको छ । फैसलापछि थप हिंसा हुने आशंकामा देशभर सुरक्षा व्यवस्था कडा पारिएको छ ।