७.४ म्याग्निच्युडको भूकम्पले कोलम्बियामा ब्यापक क्षति, छिमेकी देशहरूसम्म कडा झट्का

बोगोटा — दक्षिण अमेरिकी मुलुक कोलम्बियाको पश्चिमी क्षेत्रमा सोमबार ७.४ म्याग्निच्युडको शक्तिशाली भूकम्प गएको छ। स्थानीय समय अनुसार बिहान ७:३४ बजे गएको यस विनासकारी भूकम्पका कारण हालसम्म कम्तीमा २२ जनाको मृत्यु भइसकेको छ भने ठूलो संख्यामा मानिसहरू घाइते र भग्नावशेषभित्र पुरिएका छन् । भूकम्पको कडा झट्का छिमेकी देशहरू इक्वेडर, पानामा र भेनेजुएलासम्म महसुस गरिएको थियो ।

केन्द्रविन्दु र भूकम्पको प्रकृति
अमेरिकी भौगर्भीक सर्वेक्षण (उस्ग्स्) र कोलम्बियाको भूगर्भ सेवा विभागका अनुसार भूकम्पको केन्द्रविन्दु राजधानी बोगोटाबाट लगभग २८० किलोमिटर पश्चिममा पर्ने चोको  विभागको सान जोसे डेल पाल्मार गाउँ नजिकै जमिनको सतहबाट करिब ९६ देखि ११० किलोमिटर गहिराइमा रहेको थियो । मुख्य झट्कापछि ५।० म्याग्निच्युडको ठूलो पराकम्प समेत गइसकेको छ। गहिराइ धेरै भएका कारण ठूलो विनास हुनबाट जोगिए पनि केन्द्रविन्दु आसपासका कमजोर संरचनाहरू पूर्ण रूपमा ध्वस्त भएका छन् ।

शहरहरूमा ब्यापक क्षति र उडानहरू अवरुद्ध
भूकम्पका कारण कोलम्बियाका विभिन्न शहरहरूमा ठूलो भौतिक र मानवीय क्षति पुगेको छ:

पेरेरा (पेरेइर): यस सहरमा मात्रै १८ जनाको मृत्यु भएको छ, जसमा म्याटेकानिया अन्तर्राष्ट्रिय विमानस्थलको केही भाग भत्किँदा तीन जनाले ज्यान गुमाएका छन् ।
काली (कलि): सहरका मेयर अलेहान्ड्रो एडरका अनुसार कम्तीमा २० वटा भवनहरू पूर्ण रूपमा भत्किएका छन् र भित्र मानिसहरू पुरिएका छन् । सहरका धेरै क्षेत्रमा विद्युत् र सञ्चार सेवा पूर्ण रूपमा अवरुद्ध भएको छ ।
मनिजालेस र क्विब्डो: मनिजालेसमा ऐतिहासिक क्याथेड्रल चर्चको एउटा बुर्जा भत्किएको छ भने ४ तले आवासीय भवन ढलेको छ । चोकोकी गभर्नर नुबिया क्यारोलिना कोर्डोबाले क्षेत्रीय राजधानी क्विब्डोमा स्थिति निकै भयावह रहेको र दर्जनौँ घरहरू भत्किएको बताएकी छन् ।
६ विमानस्थल बन्द: रनवे तथा टर्मिनल भवनहरूमा भौतिक क्षति भएपछि र प्राविधिक जाँचका लागि पेरेरा, मनिजालेस, क्विब्डो, आर्मेनिया, कार्टागो र बुएनाभेन्चुरा गरी ६ वटा क्षेत्रीय विमानस्थलहरूले आफ्ना उडान सेवा पूर्ण रूपमा बन्द गरेका छन् ।
राजधानी बोगोटामा पनि भूकम्पको कडा धक्काका कारण चेतावनी साइरन बजेपछि नागरिकहरू घर र गगनचुम्बी भवनहरू छोडेर आतङ्कित हुँदै सडकमा भागेका थिए। यद्यपि, बोगोटाका मेयर कार्लोस गालानले राजधानीमा केही भवनहरू चर्किए पनि ठूलो मानवीय र भौतिक क्षति नभएको पुष्टि गरेका छन् 

उद्धारमा सेना परिचालन र अन्तर्राष्ट्रिय सतर्कता
कोलम्बियाका राष्ट्रपति अबेलार्डो डे ला एस्प्रिएलाले तत्कालै राष्ट्रिय विपद् जोखिम व्यवस्थापन एकाइको संकटकालीन बैठक डाकेर उद्धार र राहत कार्यको नेतृत्व आफैंले सम्हालेका छन्। प्रभावित क्षेत्रमा उद्धारका लागि कोलम्बियन सेना र वायुसेनाका हेलिकप्टरहरू परिचालन गरिएको छ । बोगोटा र मेडेलिन जस्ता ठूला सहरबाट विशेष खोजी तथा उद्धार टोलीहरू कुकुरसहित क्षतिग्रस्त क्षेत्रतर्फ पठाइएको छ ।

अधिकारीहरूले पराकम्पहरू आउने क्रम जारी रहने भएकाले नागरिकहरूलाई तत्काल सुरक्षित स्थान र खुल्ला चौरमा बस्न अपिल गरेका छन् । अमेरिकी सुनामी चेतावनी प्रणालीले भने प्रशान्त महासागरीय तटीय क्षेत्रमा यस भूकम्पबाट सुनामी आउने कुनै खतरा नरहेको प्रष्ट पार्दै सर्वसाधारणलाई ढुक्क रहन आग्रह गरेको छ ।