सकियो रवि लामिछानेको बयान ,दिए इन्कारी बयान

काठमाडौं । राष्ट्रिय स्वतन्त्र पार्टी (रास्वपा) सभापति तथा निलम्बित सांसद रबि लामिछानेसँगको बयान सकिएको छ। पोखराको सूर्यदर्शन सहकारीको बचत रकम अपचलन मुद्दामा जिल्ला अदालत कास्कीले उनीसँग बयान लिएको हो।

जिल्ला अदालत कास्कीका न्यायाधीश नीतिज राईको इजलासमा लामिछानेको दुई दिन बयान दिएका हुन्।

सोमबार र मंगलबार अदालतमा लगिए पनि पालो नआएका कारण उनको बयान हुन सकेको थिएन। सोही बीचमा उनी संघीय संसद्को सांसद पदबाट निलम्बन भइसकेका छन्।

मंगलबार अबेर गोर्खा मिडियाका पूर्वउपाध्यक्ष तथा पूर्वडीआईजी छविलाल जोशीसँग बयान सकिए पछि अर्का प्रतिवादी लिला पछाईसँग बयान लिन सुरु भएको थियो। जसका कारण यसअघि उनी अदालतमा गए पनि बयान दिन नपाएपछि यसै हिरासतमा फर्केका थिए।

कास्की अदालतको बेन्चले सुनुवाइ सकिएपछि रवि लगायतलाई धरौटी वा साधारण तारेखमा छाड्ने वा पुर्पक्षमा पठाउने भन्नेबारे आदेश दिनेछ।

सरकारी वकिलको कार्यालय, कास्कीले लामिछाने, छविलाल जोशीसहित ४४ जनालाई आइतबार सहकारी ठगीको आरोपमा प्रतिवादी बनाएर मुद्दा दर्ता गरेको छ। सोही अभियोगमा ५ जनालाई बिगो अनुसारको सम्पत्ति जफत गर्ने प्रयोजनका लागि मात्र प्रतिवादी कायम गरिएको छ ।

रबि पक्राउ परेको ९२औं दिनमा सरकारले आइतबार अभियोगपत्र दर्ता गरेको हो। लामिछानेविरुद्ध भने तीन वटा कसुरमा मुद्दा दर्ता भएको छ। लामिछानेविरुद्ध सङ्गठित अपराध, सहकारी ठगी र सम्पत्ति शुद्धीकरण सम्बन्धी कसुरमा अभियोग पत्र दर्ता गरिएको छ।

गत शुक्रबार मात्रै यही घटनामा गोर्खा मिडियाका अध्यक्ष जीबी राई सहित १९ जनाविरुद्ध पूरक अभियोग पत्र दर्ता भएको थियो। १८ असोज, २०८० मा राई लगायतको समूहविरुद्ध मुद्दा दायर भएको थियो।

प्रहरीले ६५ जनालाई प्रतिवादी कायम गर्न राय दिएपनि सरकारी वकिलको कार्यालयले भने प्रतिवादीको संख्या घटाएर मुद्दा दायर गरेको छ। लामिछाने सहित ४९ जनालाई सम्पत्ति शुद्धीकरण, सहकारी ठगी र संगठित अपराध गरेको कसुरमा तथा जीवी राई र लीला पछाईंलाई राष्ट्रबैंक ऐन अन्तर्गतको कसुरमा पनि सजाय गर्न मागदाबी लिनुपर्ने राय दिएको थियो।

रवि लामिछाने र जीवी राई सहितको समूहले सूर्यदर्शन सहकारीबाट १ अर्ब ५१ करोड अपचलन गरेको प्रहरीको अनुसन्धान निष्कर्ष छ। सूर्यदर्शनको ५ करोड ४८ लाख निक्षेप गोरखा मिडिया नेटवर्क प्रालिमा लगेर अपचलन गरेको भेटिएको प्रहरीको दाबी छ। सहकारीको बचत रकम अपचलन गरेको आरोपमा सभापति लामिछाने गत कात्तिक २ गते काठमाडौंबाट पक्राउ परेका थिए।

लामिछानेले सम्पत्ति शुद्धीकरण निवारण ऐन अनुसार आफूले गैरकानुनी आर्जन नगरेको बताएका छन्। ‘मेरो खातामा आउने जाने/गरेको ‘ट्रान्जेक्सन’ विवरण देखाइएको हो,’ उनले बयानमा भनेका थिए, ‘मेरो खातामा आउने जाने घुमेको घुम्यै भएर देखिएको हो। गैरकानुनी सम्पत्ति आर्जन गर्ने काम मैले गरेको छैन।’ 

इजलासमा उपस्थित अधिवक्ता युवराज पराजुलीका अनुसार लामिछानेले संसदीय छानबिन समिति र प्रहरीलाई दिएको बयानसँग मिल्दोजुल्दो बयान अदालतमा दिएका छन्।

जिल्ला सरकारी वकिलको कार्यालयले जिल्ला अदालतमा दर्ता गरेको अभियोगपत्रमा लामिछानेलाई सम्पत्ति शुद्धीकरणतर्फ २७ करोड ८९ लाख ४४ हजार ७०५ रुपैयाँ गैरकानुनी आर्जन गरेकाले असुल उपर गर्न बिगो माग गरेको थियो। अभियोग पत्रमा लामिछानेको खाताबाट भएको त्यतिका रकम कारोबारको स्रोत नखुलेको र गैरकानुनी रूपमा आर्जन गरेको अभियोग लगाइएको छ।

उक्त प्रश्नको जबाफमा लामिछानेले आफ्नो बैंक खाताबाट कारोबार भएको रकम मात्र भएकाले उक्त रकम आफूले आर्जन नगरेको बयान दिएका हुन्। 

अभियोग पत्रमा लामिछानेलाई सहकारी ठगीतर्फ ३ करोड ३७ लाख ६५ हजार रुपैयाँ बिगो माग गरिएको छ। 

सहकारी ठगीका प्रश्नमा लामिछानेले आफू कुनै पनि सहकारीको सेयर सदस्य, सञ्चालक लगायत कुनै पदमा नभएको, सहकारीबाट ऋण माग नगरेको र गोर्खा मिडिया नेटवर्क प्रालिमा सहकारीको पैसा लैजाने निर्णय प्रक्रियामा पनि आफ्नो संलग्नता नरहेको बयान दिएका छन्। 

‘सहकारी ठगीमा मेरो कुनै संलग्नता छैन। मैले कही फर्म भरेको छैन। निर्णय भएको पनि होइन,’ अधिवक्ता पराजुलीका अनुसार उनले बयानमा भनेका छन्, ‘संसदीय समितिको प्रतिवेदनले पनि मलाई ‘क्लिन चिट’ दिएकै छ।’

संगठित अपराधतर्फको प्रश्नमा पनि उनले यसअघि जस्तै इन्कारी बयान दिएका छन्। सहकारी ठगीमा संलग्न नै नभएपछि संगठित अपराधमा संलग्न हुने कुरै नहुने उनले बयानमा बताएका छन्।