×

इन्टेलले कम्पनि पुनर्संरचनाको नाममा २४ हजार कर्मचारी हटाउदै

images

काठमाडौँ । विश्वको सबैभन्दा ठूलो सेमीकन्डक्टर कम्पनी मध्ये एक, इन्टेलले यस वर्ष २४ हजारभन्दा बढी कर्मचारी हटाउने भएको छ । कम्पनीले नयाँ सीईओ लिप-बु ट्यानको नेतृत्वमा ठूलो मात्रामा लागत कटौती र पुनर्संरचनाको घोषणा गरेको छ ।

यससँगै, इन्टेलले जर्मनी र पोल्याण्डमा आफ्ना आवश्यक विस्तार परियोजनाहरू पनि रद्द गरेको छ । कम्पनीले आफ्नो वित्तीय स्थिति सुधार गर्न र बजारमा प्रतिस्पर्धालाई बलियो बनाउन यस्तो कदम चाल्न लागेको बताएको छ । 

२०२४ को अन्त्यसम्ममा, इन्टेलमा ९९ हजार ५०० कर्मचारी थिए । यद्यपि, कटौतीपछि, यो संख्या २०२५ को अन्त्यसम्ममा ७५ हजारमा झर्नेछ । सीईओ ट्यानले कर्मचारीहरूलाई लेखेको पत्रमा कम्पनीको निर्णयलाई कडा र आवश्यक निर्णयको रूपमा ब्याख्या गरेका छन् । यस वर्षको दोस्रो त्रैमासिकमा, कम्पनीले पहिले नै व्यवस्थापन स्तर आधा घटाइसकेको छ र १.९ बिलियन डलरको पुनर्संरचना खर्च रेकर्ड गरेको छ ।

इन्टेलले जर्मनीमा तीन हजार कर्मचारीको लागि प्रस्तावित मेगा-फ्याब र पोल्याण्डमा दुई हजार कर्मचारीको लागि निर्माण गरिने एसेम्बली र परीक्षण सुविधा रद्द गरेको छ । यी परियोजनाहरू पहिले नै दुई वर्षको लागि २०२४ सम्म स्थगित गरिएको थियो ।

यस बाहेक, कोस्टा रिकामा इन्टेलका ३४ सय कर्मचारीमध्ये दुई हजारभन्दा बढी यस कटौतीबाट प्रभावित हुनेछन् । किनभने कम्पनीले आफ्नो एसेम्बली र परीक्षण सुविधा भियतनाम र मलेसियामा स्थानान्तरण गर्ने बताएको छ ।

अमेरिकाको ओहायोमा रहेको कम्पनीको २८ अर्ब डलरको चिप कारखाना, जुन २०२५ सम्ममा पूरा हुने भनिएको थियो । अब यो बजारको माग अनुसार सुस्त गतिमा निर्माण गरिनेछ र यसको काम २०३० पछि मात्र पूरा हुनेछ । यस परियोजनाले बाइडेन सरकारको चिप्स ऐनबाट कोष प्राप्त गरेको थियो । 

इन्टेलले हालै १२.९ अर्ब डलरको आम्दानीमा २.९ अर्ब डलरको त्रैमासिक घाटा रिपोर्ट गरेको छ, जुन पछिल्लो ३५ वर्षमा कम्पनीको सबैभन्दा लामो घाटा अवधि हो । कुनै समय पीसी चिप्समा अग्रणी रहेको इन्टेल अहिले कृत्रिम बुद्धिमत्ता (एआई) क्षेत्रमा एनभिडिया र एएमडी जस्ता प्रतिस्पर्धीहरू भन्दा पछाडि परेको छ ।

इन्टेलले जुनमा आफ्नो अटोमोटिभ चिप बनाउने युनिट बन्द गर्यो र जुलाईमा रियलसेन्स कम्प्युटर भिजन युनिटलाई अलग गर्यो । कम्पनीले सेप्टेम्बरदेखि कार्यालयमा फर्कने नीति लागू गर्नेछ । 

इन्टेलको यो रणनीति कम्पनीलाई आर्थिक रूपमा स्थिर पार्न र बजारमा यसको स्थिति फेरि बलियो बनाउनको लागि ठूलो कदम भनेको छ ।

शनिबार ११ साउन २०८२ ०९:०५ PM मा प्रकाशित

प्रतिक्रिया