June 22, 2021, Tuesday
८ असार २०७८, मंगलवार

मुलुकमा अनिष्टको संकेत, दोलखा भिमसेनको शिलामा पसिना आयो

दोलखा, २५ वैशाख । दोलखा भिमसेनको शीलामा पसिना आएको छ । शनिबार दिउँसो करिब १ बजेतिर शिलामा पसिना आएको हो । भिमेश्वर मन्दिरको शिलामा पसिना आएपछि मुलुकमा अनिष्ट हुने विश्वास छ । यसअघि गत मंसिरमा पनि शिलामा पसिना आएको थियो । अनिष्टको चर्चा हुँदाहुँदै ५ पुसमा प्रधानमन्त्री केपी ओलीको संसद विघटन गरेका थिए । भिमसेनको शिलामा पसिना आएपछि क्षमा पूजा गरे अनिष्ट टर्ने जनविश्वास रहिआएको छ । यसैबीच शिलाको क्षमा पूजाका लागि दनेलाखाका प्रजिज, प्रहरी प्रमुखसहित भिमेश्वर मन्दिर पुगेका छन् ।

Advertisement

यसअघि २०७७ मंसिर ९ गते १८ औं पटक र २०७६ फागुन ८ गते १७ औं पटक भीमसेनलाई पसिना आएको थियो। २०७७ मंसिर पछि पाँच महिना नपुग्दै एकै वर्षमा दुई पटक पसिना आएकोले देशमा अनिष्ट हुने गुठियारहरुले अनुमान लगाएका छन्। गत वर्ष सवा घण्टासम्म पसिना आएको थियो । आज मध्यान्ह सवा १२ बजेदेखि भीमेश्वरको शिलामा निरन्तर पसिना आइरहेको छ। भीमेश्वर मन्दिर तथा पुजा व्यवस्थापन समितिका अध्यक्ष भरत श्रेष्ठले १९ औं पटक पसिना आएको बताउनुभयो । भीमेश्वरको शिलाको दायाँ बायाँ दुवै भागबाट पसिना आएको उहाँले जानकारी दिनुभयो ।

दायाँ पट्टिबाट पसिना आउँदा राजापक्षलाई र बायाँपट्टिबाट पसिना आउँदा जनतालाई अनिष्ठ हुने धार्मिक मान्यता रहँदै आएको छ। भीमेश्वरको शिलामा पसिना आए पछि मन्दिर व्यवस्थापन तथा गुठियारहरुले स्थानीय रुपमा क्षमा पूजा गरेका छन्। भीमेश्वरलाई पसिना आउँदा घण्टा, नगरा, झ्याली, बाजा बजाएर क्षमा पुजा गर्ने चलन भएपनि निषेधाज्ञाको कारण नबजाइएको समितिले जनाएको छ।

थप क्षमा पूजाको लागि शिलामा आएको पसिना पुछेको रुवा जिल्ला प्रशासन कार्यालयको रोहवरमा गृहमन्त्रालयमार्फत राष्ट्रपतिको कार्यालयमा पुर्‍याउने व्यवस्था गरिएको छ। राजाको पालामा पसिना आउँदा भने राजदरबारबाट क्षमा पुजाको लागि पञ्चवली पठाउने चलन रहेको थियो।यसअघि २०६२/०६३ को जनआन्दोलनको एकमहिना अघि, तत्कालिन राजा वीरेन्द्र बंशनाश हुनुभन्दा करिब डेढ महिना अघि र १९९० सालको भुकम्प आउनुभन्दा अघि भीमेश्वरलाई पसिना आएको थियो।