सशस्त्र द्वन्द्वका बेला दुई छोरा लगायत सम्पूर्ण गुमाएँ, न्याय अहिलेसम्म पाइँन

सशस्त्र द्वन्द्वका बेला दुई छोरा लगायत सम्पूर्ण गुमाएँ, न्याय अहिलेसम्म पाइँन

काठमाडौं । “एक दशकभन्दा लामो सशस्त्र द्वन्द्वका बेला दुई छोरा गुमाएँ, फौजिले घरमै आएर पाँच लाख लुटे, उनीहरुबाट पाएको यातनाले शरीर छियाछिया भयो, आँखैअगाडि श्रीमतीमाथि दुव्र्यवहार गरियो, द्वन्द्व सकियो, तर वर्षौंसम्म पनि न्याय पाइनँ । यो बेदना हो नेपालगन्जका पूर्णप्रसाद पौडेलको ।

सर्वोच्च अदालतले आदेश पाएको १५ दिनभित्र आवश्यक सुविधा तथा अन्य सहुलियत दिनका लागि सिफारिस गर्न सत्य निरुपण तथा मेलमिलाप आयोगलाई परमादेश दिएपछि पौडेलले न्याय पाउने आशा पलाएको बताउनुभएको हो ।

सशस्त्र द्वन्द्वको समयमा पौडेल १८ महिनासम्म बाँकेको सैनिक हिरासतमा प्रताडित हुनु परेको थियो । आँखामा पट्टी बाँधेर राखिने, पछाडि हात लगेर बाँध्ने, करेन्ट लगाइने, हात खुट्टाको औंलामा पिन ठोक्ने, खुट्टाको अघिल्लो भाग चिरेर दुई औंला एकातिर र बाँकी तीन औंला अर्कोतिर पारिनेजस्ता कार्यहरु गरिन्थ्यो र त्यस्ता कार्यबाट आफू प्रताडित भएको पौडेलले सर्वोच्च अदालतसमक्ष बताउनुभएको थियो ।

उनका छोराछोरी २०५८ साल माघ १५ गतेदेखि विद्यालयबाट निकालिए । “पढ्न नपाएर कान्छा छोराले २०६२ साल फागुन ८ गते आत्महत्या गर्यो ।”, सर्वोच्च अदालतमा पौडेलले सुनाउनुभयो भने अर्का छोरा २०७४ साल असार २७ गते भेरी नदीको किनारमा मृत अवस्थामा भेटिएका थिए ।

पौडेल सैनिकको कब्जामा नै रहेको अवस्थामा २०५८ साल पुस २४ गते ७० जनाको टोली आफ्नो घर गई ५ लाख रुपियाँ लुटपाट गरेको गुनासो पनि उहाँले अदालतसमक्ष गर्नुभयो । आफू सैनिक कुटाइबाट थला परेको र उपचारका लागि ११ लाख खर्च लागेको पनि पौडेलको बयानमा उल्लेख छ ।

त्यसको शोधभर्ना माग्न जाँदा सम्बन्धित प्रमुख जिल्ला अधिकारीको कार्यालयले सबै सक्कल बिल हराइदिएको पनि उहाँको गुनासो छ । यो खबर आजको नेपाल समाचारपत्र दैनिकमा रहेको छ ।

Share This
  • 2
  •  
  •  
  •  
  •  
  •  
  •  
  •  
  •  
  •  
    2
    Shares