पश्चिम सेती आयोजना निर्माण मेरै कार्य काल मा हुन्छ: प्रधानमन्त्री ओलि

पश्चिम सेती आयोजना निर्माण  मेरै कार्य काल मा हुन्छ: प्रधानमन्त्री ओलि

डडेलधुरा : प्रधानमन्त्री केपी शर्मा ओलीले सुदूरपश्चिममा विद्युत आपूर्ति व्यवस्थित, भरपर्दो र प्रभावकारी बनाउन डडेलधुराको स्याउलेमा निर्माण गरिएको सबस्टेसनको उद्घाटन गरेका छन् । प्रधानमन्त्री ओलीले मंगलबार अमरगढी नगरपालिका वडा नं. १ दुधकाँडेमा नेपाल सरकारको लगानी मानिर्माण भएको १३२–३३ केभी सवस्टेशनको उद्घाटन गरेका हुन् ।

सब स्टेसन सञ्चालनमा आएसँगै सुदूरपश्चिम क्षेत्रका पहाडी जिल्लाहरुमा आगामी दिनमा निर्माण हुने जलविद्युत आयोजनाबाट उत्पादन हुने विद्युत त्यहींमार्फत राष्ट्रिय प्रसारण प्रणालीमा प्रवाह गराउन पूर्वाधार पनि तयार भएको छ । यसले त्यस क्षेत्रको विद्युत विकासका लागि सहज वातावरण निर्माण हुनेछ ।

प्रधानमन्त्री ओलीले सब स्टेसनको निर्माणपछि सुदूरपश्चिमको विद्युत् आपूर्ति नियमित र भरपर्दो बनाउन महत्वपूर्ण भूमिका खेलेको बताए । आफ्नो पहिलो कार्यकालमा सब स्टेसनको ठेक्का प्रक्रिया सुरु भएको उल्लेख गर्दै ओलीले ७५० मेगावाटको पश्चिम सेती आयोजना पनि आफ्नै कार्यकालमा निर्माण सुरु गर्ने घोषणा गरे ।

‘सुदूपश्चिमको आर्थिक विकाससँग जोडिएको पश्चिम सेती मेरै कार्यकालमा निर्माण सुरु हुन्छ’, उनले भने, ‘विद्युत् नपुगेको क्षेत्रमा पनि व्यापक रुपमा विद्युतीकरण गर्नेछौं ।’ कार्यक्रममा ऊर्जा, जलस्रोत तथा सिंचाइ मन्त्री वर्षमान पुनले सब स्टेसनको निर्माणले सुदूरपश्चिममा ऊर्जा क्षेत्रको लागि महत्वपूर्ण पूर्वाधार तयार गरेको बताए । ‘

यस क्षेत्रमा अध्ययन, निर्माणाधीन तथा निर्माण चरणमा रहेका आयोजनाबाट उत्पादन हुने विद्युत्लाई वितरण गरी खपत गर्न नसकेको अवस्थामा अब त्यसलाई अन्य क्षेत्रमा लैजान सक्ने गरी पूर्वाधार क्षमता तयार भएको छ’, उनले भने । ‘

पश्चिम सेती अगाडि बढाउन अहिले लगानी बोर्डमा छलफल भइरहेको छ । यस क्षेत्रका जनताको भावनालाई समेटेर पश्चिम सेती उपयुक्त लगानी मोडलमा तत्काल निर्माणमा लैजान ऊर्जा मन्त्रालय प्रतिबद्ध छ ।’ दार्चुलास्थित ३० मेगावाटको चमेलिया जलविद्युत आयोजनाको विद्युत स्याउले सब स्टेशनबाटै डडेलधुरा, बझाङ, दार्जुला, डोटी, वैतडी र अछाममा वितरण भइरहेको छ ।

यसअघि नेपाल विद्युत प्राधिकरणले चमेलियाको विद्युत दार्चुलाको बलाँचबाट १३१ किलोमिटर १३२ केभी प्रसारण लाइनमार्फत कैलालीको अत्तरिया पुर्याई फेरि करिब १ सय किलोमिटर ३३ केभी फिडरमार्फत ती जिल्लामा आपूर्ति गर्दै आएको थियो ।

प्राधिकरणका कार्यकारी निर्देशक कुलमान घिसिङले स्याउले सब स्टेसन सञ्चालनमा आएपछि सुदुपश्चिमका पहाडी जिल्लाहरुमा विद्युत प्रवाहको गुणस्तरलाई पनि बढाएको बताए । ‘स्याउले सब स्टेशन निर्माण हुनु भन्दा पहिला अत्तरिया सब स्टेशनबाट पहाडी जिल्लाहरुमा एउटा ३३ के.भी. फिडर मार्फत विद्युत वितरण गरिन्थ्यो, जसले गर्दा कुनै एक ठाउँमा फल्ट भए पनि सबै जिल्लाहरु अन्धकारमा बस्नुपर्ने बाध्यता थियो, ’घिसिङले भने ।

‘स्याउले सब स्टेसनबाट विद्युत् आपूर्ति हुन थालेपछि यस्तो अवस्था हटेको छ । त्यस क्षेत्रको विद्युत प्रवाहको गुणस्तर तथा विश्वसनियता पनि पहिला भन्दा मजबुत भएको छ ।’ ३० मेगावाटको चमेलिया र नौगाड जलविद्युत केन्द्रबाट उत्पादन भएको करिब ३८ मेगावाट विद्युत मध्येबाट स्याउले सब स्टेसन मार्फत डडेलधुरा, बैतडी, बझाङ, अछाम, डोटी र बाजुराका करिब १२ लाख जनतालाई नियमित र भरपर्दो विद्युत् आपूर्ति भइरहेको उनले जानकारी दिए ।

सबस्टेशनमा अहिले आफ्नो क्षमताको करिब ३० प्रतिशत मात्रै सञ्चालनमा भइरहेकाले सुदूरपश्चिम प्रदेशका पहाडी जिल्लाहरुमा खुल्ने उद्योगलाई पर्याप्त मात्रामा विद्युत् आपूर्ति गर्न सकिने प्राधिकरणले जनाएको छ । यसले सुदूरपश्चिमको पहाडी जिल्लाहरुमा विकास तथा आर्थिक समृद्धिका लागि महत्वपूर्ण भूमिका खेल्ने अपेक्षा गरिएको छ ।नेपाली पैसा