नख्खु कारागारको पुनःनिर्माण अन्तिम चरणमा

नख्खु कारागारको पुनःनिर्माण अन्तिम चरणमा

काठमाडौँ । नख्खु कारागारका भूकम्पका समयमा क्षतिग्रस्त ब्लकको पुनःनिर्माण अन्तिम चरणमा पुगेको छ । आगामी असारसम्ममा दुई ब्लकको काम सक्ने योजना रहेको जेलर जीवन दुलालले बताए ।
भूकम्पका समयमा यहाँका ब्लक पूर्ण क्षतिग्रस्त भएपछि दुई वर्ष अघिदेखि यहाँ पुनःनिर्माण शुरु भएको थियो । कम्युनिटी रिहविलिटेशन सेन्टर (सिआरसी) र ड्रग्स रिहविलिटेशन सेन्टर (डिआरसी) को पुनःनिर्माण भइरहेको हो । सम्झौताको अवधिभित्रै काम सक्ने गरी काम भइरहेको छ । राणाकालमा बनेको कारागारका ब्लक त्यतिबेला पूर्ण क्षतिग्रस्त बनेको जेलर दुलालले बताए । यी दुई ब्लकमा रहेका कैदीबन्दीलाई भूकम्पपछि अस्थायी ब्लक बनाएर राखिएको थियो । ती अस्थायी संरचना पनि प्रयोग गरिरहन मिल्ने र नयाँ बन्ने ब्लकमा पनि कैदीबन्दी राख्दा यहाँ कैदीबन्दी राख्ने क्षमता अझै बढ्ने उहाँले बताए । दुई वर्ष पहिलेसम्म ५०० को हाराहारीमा कैदीबन्दी रहेकामा अहिले यहाँ एक हजारभन्दा बढी कैदीबन्दी रहेका छन् ।
कारागारमा एक वर्ष पहिले एउटा ब्लकको निर्माण सकिएर सञ्चालनमा आएको थियो । कारागारभित्रै मनोसामाजिक अस्पतालको निर्माण सकिएको छ र छिट्टै सञ्चालनको तयारी भइरहेको छ ।